കാഴ്ച

എന്‍റെ കാഴ്ചയ്ക്ക് കാര്യമായി എന്തോ സംഭവിച്ചിരിക്കുന്നു.

വഴിയോരങ്ങളിലെ പലതും ഞാന്‍ ഇന്നു കാണാതെ പോകുന്നു.

കൊച്ചു കുട്ടിയുടെ ചിരിക്കുന്ന മുഖവും, മനോഹരമായ പൂക്കളും,

മഴവില്ലും, അരുവികളും...അങ്ങനെ സുന്ദരമായ പലതും ഇന്നെന്‍റെ കാഴ്ചയ്ക്ക് അന്യം വന്നിരിക്കുന്നു.

ഇന്നു എന്‍റെ കാഴ്ച ചില നോട്ടുകെട്ടുകളില്‍ മാത്രം ഉതുങ്ങി കൂടിയിരിക്കുന്നു.

മുന്നറിയിപ്പ്...

നിങ്ങളുടെ ജീവിതം ഒരു തുറന്ന പുസ്തകം ആണെങ്കില്‍ നിങ്ങള്‍ സൂക്ഷിക്കുക.

അതിലെ നല്ല താളുകള്‍ നാളെ ചിലര്‍ കീറി എടുക്കും........ മറ്റുള്ളവയില്‍ മറ്റു ചിലര്‍ കുത്തി വരയ്ക്കും.

ഒടുവില്‍ നിങ്ങളുടെ പേരു പതിഞ്ഞ , അഴുക്കു പുരണ്ട പുറം ചട്ട മാത്രം ബാക്കി നില്ക്കും, കാലത്തിനു മുന്നില്‍ ഒരു പരിഹാസ ചിഹ്നം ആയി.

ചോദ്യങ്ങള്‍...

എന്‍റെ കണ്ണുകളില്‍ വിടര്‍ന്നിരുന്ന എല്ലാ ചോദ്യങ്ങള്‍ക്കും ഞാന്‍ ഉത്തരം കണ്ടെത്തിയിരുന്നത് അവളുടെ നീണ്ട മൌനങ്ങളില്‍ ആയിരുന്നു.

ഇന്നവള്‍ വാചാല ആയിരിക്കുന്നു..................

ഉത്തരമില്ലാത്ത മറ്റു ഒരു പിടി ചോദ്യങ്ങള്‍ കൂടി എനിക്ക് സമ്മാനിച്ചു കൊണ്ടു.

കടല്‍ത്തീരം.

പണ്ടു നമ്മള്‍ കൈയ്യുകള്‍ കോര്‍ത്ത്‌, സ്വപ്നം കണ്ടു നടന്ന കടല്‍ത്തീരത്ത്‌ , ഇന്നു മല്‍സ്യങ്ങള്‍ ചത്തു അടിഞ്ഞു കിടക്കുന്നു.

പ്രണയത്തിന്‍റെ മണമുണ്ടായിരുന്ന അവിടത്തെ ഇളം കാറ്റിനു , ഇന്നു മനം മടുപ്പിക്കുന്ന ദുര്‍ഗന്ധം.

തടവറ

പ്രതീക്ഷകളുടെ തടവറയില്‍ കാലം എനിക്ക് വിധിച്ചത് - ജീവപര്യന്തം.

സ്നേഹത്തിന്‍റെ ചങ്ങലകളാല്‍ എനിക്ക് അവിടെ ബന്ധനം.

വാശി.

ഞാന്‍ എഴുതുന്ന അക്ഷരങ്ങള്‍ എന്നോട് തര്‍ക്കിച്ചു തുടങ്ങിയിരിക്കുന്നു.

എന്‍റെ ചിന്തകള്‍ക്ക് അടിമപെടാന്‍ ഇനി അവയ്ക്ക് വയ്യത്രെ!!!!

അക്ഷരങ്ങള്‍ക്കു കീഴടങ്ങാന്‍ കൂട്ടാക്കാതെ വാശിയില്‍ എന്‍റെ ചിന്തകളും.

ഉയര്‍ത്തെഴുന്നേല്‍പ്പ്..

നമ്മുടെ എല്ലാ സ്വപ്നങ്ങളും പ്രതീക്ഷകളും കത്തി അമര്‍ന്ന്

ഒരു പിടി ചാരം ആയി മാറിയിരിക്കുന്നു.

എങ്കിലും, ഈ ചാരങ്ങളില്‍ നിന്നും നമ്മള്‍ ഉയര്‍തെഴുനെല്‍കും.

കാലത്തിന്‍റെ അഗ്നിക്കായി ഒരു പിടി സ്വപ്നങ്ങളും പ്രതീക്ഷകളും

കരുതി വെച്ചു കൊണ്ടു.